Үл хөдлөх хөрөнгийн салбар гэдэг холбоо үг уян хатан ажлын цагтай, сарын орлогоо маш хурдан огцом өсгөх боломж, бүр цаашлаад нэлээн залуудаа саятан болох ховор боломжийг өгдөг. Үл хөдлөхийн мэргэжилтнүүд цалин хүлээдэггүй, харин өөрсдөө хичээж, сайн ажиллах л юм бол хүссэн орлогоо олох давуу талтай мэргэжил юм. Энэ салбарт яаж мөнгө олохыг ойлгож ухаарсан хүн, үүнээс маш их орлого олох бүрэн боломжтой байдаг байна. Гэхдээ үл хөдлөхийн салбарт олон агент шинээр ордог ч тэр их хэмжээний мөнгийг олохын тулд тун шаргуу хөдөлмөрлөх ёстойг ойлгосныхоо дараа энэ салбараас зодог тайлах нь олонтаа. Харин бидний энэ удаад танилцуулах Мелани Бажровикийн хувьд энэ мэргэжлээр ажиллах гэж л төрсөн мэт хүн юм.

“Би насаараа хоол зөөж гүйхийг хүсээгүй” гэж Мелани яриагаа эхэлжээ. Цагаач гэр бүлийн охины хувьд Мелани багаасаа л гэр бүлийнхээ зоогийн газарт ажиллаж, ирээдүйд өөртөө хөрөнгө оруулна даа хэмээн мөнгөө хуримтлуулж эхэлсэн юм.

Та 22 насандаа ямар нэгэн бизнес эрхэлдэг байв уу? Харин Меланигийн хувьд 22 настайдаа зөөгчөөр ажиллаж байхдаа хуримтлуулсан мөнгөөрөө хамгийн анхныхаа байшинг худалдан авч үл хөдлөхийн карьераа эхлүүлжээ. Ингээд энэ салбарт өөрт байгаа мөнгөө хөрөнгө оруулалт хийсээр тавхан жилийн дараа гэхэд Multi-million буюу олон сая ам.долларын хөрөнгөтэй болсон байна. Тавхан жилийн дотор үл хөдлөхийн салбарт хэрхэн сая долларын орлоготой болсон тухай асуултуудад бүсгүй ингэж хариулжээ.

Олон хүн үл хөдлөхийн салбарыг уян хатан цагтай, басхүү орлого өндөр байх боломжтой ажлын байр гэж хардаг ч, цөөн хэдэн хүн л амжилт үзүүлдэг шүү дээ. Таны хувьд амжилт яаж эхэлсэн бэ?

Би ер нь дандаа л ингэж хэлдэг. Хамгийн түрүүнд, хамгийн чухал зүйл бол боловсрол, мэдлэг эзэмших юм шүү дээ. Боловсрол бол бүх зүйлийн түлхүүр. Мэдлэгтэй байгаад түүнийгээ ашиглаж чадахгүй бол ямар ч хэрэггүй. Тиймээс үл хөдлөхийн салбарынхаа тухай боловсрол, мэдлэгтэй болохоос гадна энэ мэдлэгээ практикт ашигладаг байх нь л таны асуусан “ид шид” юм. Хүмүүс ерөнхийдөө л шийдэмгий алхам хийлгүй байгаад л байдаг. Суралцаад л, судлаад л цаг аваад байгаа нь тэд айдастай байгаатай холбоотой юм. Иймээс би нэгэнт л мэдлэг мэдээлэлтэй болсон бол шууд “АЖИЛЛАЖ ЭХЛЭХ”-ийг зөвлөж байна.

Та анхны орлогоо өөрийнхөө худалдаж авсан орон сууцыг түрээсэлж, түрээсийн орлогоосоо ашиг хүртэж олж байсан. Гэхдээ таны сая сая доллар үл хөдлөх хөрөнгийн худалдаанаас орж ирсэн шүү дээ. Яаж тийм том үл хөдлөх худалдаж авах мөнгөө олсон юм бэ?

“Хүмүүс надад, дансанд минь мөнгө байхгүй болохоор би хөрөнгө оруулж чадахгүй л гэж боддог. Гэхдээ тийм биш. Яг жинхэнэ ашиг олох наймаа олоод харчих юм бол, зээлдүүлэгчид тэр аливаа үл хөдлөх хөрөнгийг барьцаалж, зээл олгох маш дуртай байдаг. Би олон жилийн өмнөөс л санхүүжилт босгох бүтээлч аргуудыг судалсан болохоор надад бодсон юм байсан. Би 27 настайдаа хамгийн том наймаагаа хийсэн нь арилжааны зорилготой томоохон хөрөнгийг борлуулах хамгийн анхны ажил байлаа. Бүр маш өндөр үнийн дүнтэй гэрээ байсан тул би хувьдаа маш том, амьдралыг минь орвонгоор нь өөрчлөх шийдвэр гаргах болсон. Өмнө нь зөвхөн хаус худалддаг хүн байсан бол одоо би огт өөр түвшинд дэвших гэж байлаа. Энэ том гэрээг өөрийн болгохын тулд би өмнө хэлсэн шигээ санхүүжилт босгох тал дээрээ маш “creative” байдлаар ажиллаж чадсан. Зөвхөн өөрийнхөө бэлэн байгаа хуримтлалыг ашиглаад зогсоогүй, өөрт байгаа бусад бүх үл хөдлөх хөрөнгүүдийг нийлүүлж, хөрөнгө босгосон. Ингэж л би карьертаа үсрэлт хийх боломжтой болсон доо.

Та зөөгч байснаа маш өндөр амжилттай үл хөдлөхийн мэргэжилтэн болсон байна. Яаж энэ шилжилтийг хийсэн бэ? Бас хүн бүрт ийм боломж бий юу?

Би хөдөлмөрийн хөлсний хамгийн доод хэмжээгээр цалинждаг зөөгч байсан. Харин одоо нийт хөрөнгө маань хэдэн сая ам.долларт хүрчээ.  Би үл хөдлөхийн чиглэлээр мэргэжлийн сургуульд суралцаагүй, өөр шидэт арга ч хэрэглээгүй. Би бас дөнгөж эхэлмэгцээ л амжилтад хүрчихээгүй. Ер нь хэн ч байсан над шиг ингэж ажиллаж чадна. Гэхдээ тухайн хүн үнэхээр өлсгөлөн байна уу, энэ ажилдаа амжилт гаргахыг үнэхээр хүсч байна уу, гэдгээс л бүх зүйл шалтгаалдаг санагддаг. Үл хөдлөхийн салбар хүмүүсийг ялгаварлан гадуурхдаггүйгээрээ онцлогтой. Нас, хүйс огт хамааралгүй. Хамгийн гол нь та амжилтанд хүрмээр байгаа бол бүх л хүрээллийн хүмүүстэй харилцаж чаддаг байх ёстой. Мэдээж энэ бизнесийг эхлэхийн тулд заавал мэдэх ёстой хэдэн зүйл бий. Нэгэнт сураад авчихвал энэ бизнесийн танд өгөх ашгийн боломж бол хязгааргүй юм.